|
|
Jahresbricht vom Presidänt 2010 Endlech so schynts wenigschtens hei
mier ändlech oh wider mau äs Vereinslokau gfungä, wo mier lenger aus eis oder
zwöi Jahr chöi blybä. Hie im Dörfli sy sicher d’Lokalitätä nid grad ganz
optimau, aber derfür sy mier hie Wiukommä uh chöi problemlos üser Zämäkünft
dürä füehrä. Wih üeblech hei mier üser Vereinshöckä
uh d’Herbschversammlig abghautä uh äs isch so gsy wys scho syt viunä Jahrä
isch, dr hert Chärn dä chunnt we’s irgendwie müglech isch geng, as isch
gmüetlech uh z’Fridä bih üs. Ig möchte öich für die ussergwöhnlechi
Vereinströiy ganz härzlech dankä. Einzelni Ahläss wett ig aber doch noh
speziel erwähne, us erschts üsä Summerusflug, dä het üs am 4. Juli zum René
Strickler ich Roubtierpark gführt, z’Wätter ja nu, da cha mä nüt dr zue tue,
aber eigetlech hei mier ja no Glück gha ersch bim z’Mittag hetts grägnet uh so
hei mier trotz auem ganz äh gäbigä Sunntig zämä chönnä verbringä. Im Ougschtä sy mier ich Gartä vom
Lucio, ga Grillierä, beschtä Dank ah Lucio für d’Gaschtfründschaft, äs isch für
üs dört würklech ideau um mau chlih ich angerem Rahmä zämä ds sy. Ah üserä Herbschversammlig im September
hei mier beschlossä dass mier im 2011 wärdä dih Schwyzerischi
Wäuäsittichusstellig düräfüehrä! Dank üsem guetä Züchterkolleg am Urs Rupp, hei
mir ih Oberwangä mit der Mehrzwäckhauä, äh gueti Lokalität zu mä nä
Sensationeuä Prys gfungä! So langsam isch äs itz de Zyt deh Ahlass konkret ah
z’gah, ds OK isch bekannt uh jtz geits deh drum, nid numä dr vo ds redä,
sondern ich’s z’machä!!!!! Einisch meh hei mier üsä Chlousähöck
dörfä bih Grossenbacher’s ich dr Gantinä vor Firma Styner + Bienz abhutä, oh
das isch geng äh gueti Sach uh ig möchts oh hie nid ungerlah, dr Maja uh
Werner ganz härzlech z’dankä, das mier
au Jahr dörfä bih ihnä ds Gascht sy! Ändlech bih ig versuecht ds sägä,
ändlech isch äs mit äm Vögeli-märit chlih ufwärtz gangä, mier sy vo dä
Beschickigszahlä här gseh sogar no besser da gschtandä aus ich dä erschtä zwöi
Jahr, aber oh d’Bsuecher Frequänz isch bedütend grösser gsy aus ich dä Jahr dr
vor. Gfüusmässig ha ig oh gmeint, mier heigä bedüttend meh Vögu verchouft aus
ich dä erschtä Jahr, wo ig aber das ihm minä Ungerlagä nachä gluegt ha, ha ig
müessä fescht schteuä, dass das nid würklech so isch, sondern öppä im glychä Rahmä
wih ich dä erschtä zwöi Jahr. Oh g’cheglet hei mer wieder, grad
lercht vo letscht, uh oh das isch wih au Jahr äh z’Friedänä uh schönä Ahlass
gsy. Leider sy chlih weni Lüt cho, wahrschynlech isch ds Datum nid ganz
glücklech gsy? Im Gägäsatz zu dä angerä Jahr ha ig äbä vergässe ma Chlousähöck
bereits äs Datum bekannt ds gäh, so hei äbä du di Eintä oder Angerä ahschynend
nid chönnä cho. Schad aber mengisch isch äs haut so. Vom Usschtelligswäsä gits erfröilechs
z’brichtä, vieli gueti Resultat sy erzihlt wordä, dir verzeihet mier aber das
ig dieh nid aui tue Erwähnä, das gieng lenger aber so äs paar ussergwöhnlechi
wett ig hie glych yh Erinnerig rüefä! Sicher ghört da dr Yanik Stampfli schpezieu
erwähnt wo bereits zum zwöitä Mau dr schönscht Wäuäsittich vom ä nä Jungzüchter
ah dr Öiropaschou in Karlsruhe präsentiert hett. Schwyzermeischter isch dr
Yanik ah dr Swiss Bird oh no grad mit zwenä vo synä Wäuäsittichä wordä! Liebi Ornis Lüt, ig wünschä öich, aunä gueti
Gsundheit uh ganz eifach vili glücklechi Schtundä egau wo dr syt uh was dr
machet, häbets guet. Schwarzenburg im Februar 2011 Dr Presidänt: Tony Binggeli
|
|
